Къырымтатар тили олимпиадасынынъ экинджи къысмында Февзи Якъубов адына Къырым муэндислик-педагогика университетининъ студентлери иштирак эттилер.
Вазифелер ана тилимизнен багълы тест суаллеринден эм де язма иштен ибарет эди. Чешит факультетлерде тасиль алгъан студентлернен бир сырада ярышкъа алий окъув юртумызнынъ оджалары ве хадимлери де къошулдылар.
17-нджи кере тешкиль олунгъан олимпиада аньаневий суретте Халкъара ана тили куню арфесинде ачылгъан эди. Март 25-те XVII Яшлар ичюн къырымтатар тили олимпиадасына екюн чекилип, чешит номинациялар боюнджа гъалиплер такъдирленеджеклер.
Лейха тарих, санат, къырымтатар тили ве эдебияты факультети эркянындаки къырымтатар ве тюрк тильшынаслыгъы кафедрасы тарафындан амельге кечириле.
